ശ്രീനരസിംഹം

പ്രധാനമൂർത്തികളിലൊന്നായ മഹാവിഷ്ണുവിന്റെ നാലാമത്തെ അവതാരമായ ശ്രീനരസിംഹമൂർത്തിയുടെ ഈ ക്ഷേത്രത്തിലെ ഭാവം ഹിരണ്യകശിപു വധത്തിനുശേഷം പ്രഹ്ളാദനെ ആശ്ലേഷിക്കുന്ന സൗമ്യഭാവത്തിലുള്ളതാണ്. നരസിംഹക്ഷേത്രത്തിലെത്തിത്തൊഴുന്ന ഭക്തജനങ്ങൾ നരസിംഹരൂപിയായ വിഷ്ണുവിനെയും മഹാലക്ഷ്മിയെയും പ്രഹ്ളാദനെയും ഒന്നിച്ചു വേണം സ്മരിക്കാൻ. ഇവിടത്തെ നരസിംഹഭാവത്തിന് ബാലലീലകളോടാണ് ഏറെ പ്രിയമെന്നതിനാൽ കുട്ടികളുടെ നാമജപം, ഭജന, നൃത്തസംഗീതാദി കലാപ്രകടനങ്ങളെല്ലാം ദേവനെ പ്രീതിപ്പെടുത്താൻ വർഷങ്ങളായി ചെയ്തുവരുന്നു. ഇവിടത്തെ ക്ഷേത്രപരിസരത്തുവെച്ച് കുട്ടികളെ അവർ എത്ര വികൃതി കാണിച്ചാൽ പോലും ആരും വഴക്ക് പറയുകയോ ശിക്ഷിക്കുകയോ ചെയ്യാറില്ല. കേരളീയക്ഷേത്രനിർമ്മാണരീതിയിലെ ചതുരശ്രീകോവിലിൽ പടിഞ്ഞാറോട്ടുനോക്കിയാണ് ശ്രീനരസിംഹമൂർത്തി ഇവിടെ കുടികൊള്ളുന്നത്. തടിയിലുംഓടിലും തീർത്ത മേല്ക്കൂരയാണ് ഇപ്പോൾ ശ്രീകോവിലിനുള്ളത്. ശ്രീകോവിലിന് മുന്നിൽ തിടപ്പള്ളിയും ചുറ്റമ്പലവും ബലിക്കൽപുരയും ധ്വജവും നിലകൊള്ളുന്നു. ശ്രീനരസിംഹമൂർത്തിക്ക് പ്രധാനവും പ്രിയവുമായ നിവേദ്യം തണുത്തപാനകമാണ്. പാനകം പോലെതന്നെ പ്രാധാന്യമുള്ളതാണ് നെയ്‌വിളക്കും.